Fonso, gjandarm dal Pape coracîr dal Re e partigjan

di Elio Varutti Sin dongje de Fieste de Liberazion e alore viodìn la storie di Alfonso Zamparo, un partigjan particolâr. Al nassè ai 7 di Zenâr tal 1907 a Brandzen, tal comun di Buenos Aires, in Argjentine. Al fo la vie che, tal 1904, a vevin scugnût lâ i siei gjenitôrs, Pietro e Erasma Ioan, par lavorâ tant che bracents intune aziende agricule. Tal 1909 la famee e tornà in Friûl, a Favuîs di Gonârs, di dulà che e jere partide. Fonso al studià a Udin intal Istitût Zanon e la famee si jere trasferide a San Zorç di Noiâr e a Osôf, par vie dal lavôr dal pari, caselant de strade ferade. Dopo la visite di leve, tal 1927, al partì par Rome, dulà che al va a fâ il coracîr dal re. Dal 1930 fintremai al 1940 al è gjandarm dal Pape, oltri che citadin dal Vatican. A Rome al studià, si diplomà gjeometre e, tal 1937, al si indotorà in Economie e Cumierç. Tornât citadin talian, cu la seconde vuere mondiâl lu destinarin a Triest, dulà che al cognossè Lidia Bisiani, che e deventà la sô femine tal 1942. Di Triest al ven spedît a Mostar, in Erzegovine. Dopo dai 8 di Setembar dal 1943 al deventà partigjan tal Cuarp dai Volontaris de Libertât te Prime division "Osoppo-Friuli". Cul 1944 al è comandant de Tierce compagnie "Basso Cormôr", cul non di bataie di Liviano. Ai 19 di Dicembar dal 1944 lu cjaparin i fassiscj des Bandis Neris, che lu menarin in galere a Palme. Lu torturarin, ma lui nol molà. Par fâlu cjacarâ al ven picjât pai braçs, ma lui al tasè. Dopo di chest, lu menarin presonîr a Udin e in Gjermanie, a Dachau. Tal cjamp di concentrament al fo cun Faustino Barbina, Paolo Spezzotti, Giuseppe Violino, Giovanni Agnoli, Guido Toniut, Giuseppe Tomadini, Egidio Zoratti, cun pre Erino D'Agostini, pre Albino Fabbro e cun Eugenio Marin. La vie al cjatà ancje Giorgio Morocutti e Federico De Pauli, che. magari cussì no, non tornarin di vîfs. Ai 29 di Avrîl ju liberarin i americans. Zamparo, tornât a cjase, al pesave 41 chilos. Dal 1945 al 1954 al fo diretôr dal Ufici Provinciâl dal Lavôr di Udin e di Grosseto. Dal 1955 al 1970 al insegnà intai Istitûts Valussi e Stringher di Udin. Al deventà president de Cooperative "Fides" di Tor di Zuin, implantade di lui. Al ve ancje altris incarghis te gjestion des cooperativis "Costiva" e "Scarico merci ferrovie" di Udin. Fonso Zamparo al murì a 93 agns e mieç, ai 16 di Lui dal 2000, a Scorzè, in provincie di Vignesie. ©RIPRODUZIONE RISERVATA