La gnove stagjon de Filologjiche e sflorìs a Sapade

Spietant la Fraie de Vierte, sabide ai 25 di Jugn aes nûf di sere te Sale dai Congrès di Cime Sapade, Dino Persello al presentarà il so ultin spetacul teatrâl "Ognun la conte a so mût", promovût de Comission Pari oportunitâts de Comunitât montane di Tumieç. Une note di colôr linguistic, un viaç tra lis varietâts orâls de Cjargne li che il spetatôr al sarà cjapât par man di un grup di feminis cjargnelis cul lôr univiers di pinsîrs, sintiments, desideris e afiets. Al è chest l'efiet de sperimentazion di Persello, un teatri che si slontane des formis tradizionâls par rivâ invezit plui dongje de recitazion spontanie. No 'nd è palc, ni sipari, ma un laboratori in cressite, simpri viert, là che in cualsisei moment a puedin cjatâ puest gnûfs protagoniscj e la storie che si conte al public si metile dongje planc a planc ducj insieme. In cheste dimension i atôrs si movin suntune sene frescje, dant ae lôr maniere un poc ae tutele e valorizazion des tantis e vivarosis varietâts cjargnelis de lenghe furlane. La ricercje e la consulence sientifiche a son di Novella Del Fabbro; la colaborazion culturâl e tecniche e je di Celestino Vezzi, che al partecipe al spetacul ancje come atôr insieme cun Amelia Artico, Elia Ferigo, Elsa Martin, Ines Di Gleria, Livia Sala, Nives Baldacconi e Solidea Del Negro. di Monica Tallone Chê dal 2011 e je la 42e edizion de Fraie de Vierte de Societât Filologjiche Furlane: un biel primât pe tradizionâl fieste di primevere che, stant la divignince de peraule fraie di fradaie, e vûl jessi ancje une cunvigne di fradis e amîs. Si intive inalore di prin trat la sielte di cjatâsi chest an, domenie ai 26 di Jugn, a fâ fraie a Sapade, paîs cetant ninin poiât te alte Val de Plâf jenfri il Comeli e la Cjargne. Cun di fat, se ben cjapade dentri te Provincie di Belun dal 1852, Sapade in veretât e fo par secui dutun cul Friûl; un leam madressût sot dal Patriarcjât di Aquilee mai çoncjât, anzit restât salt fint a vuê, par resons sei storichis e culturâls sei di caratar religjôs: la comunitât sapadine e fâs part inmò cumò de Arcidiocesi di Udin. Di marcâ relazions e someancis e procure po dopo la nature sflandorose che si gjolt di chestis bandis massime di Mai a Jugn, co al rive il moment de floridure cui verts, i zâi, i turchins a dâsi daûr fasint a gare par viestî i cjamps. Cui che al rive sù ca sù viazant su la strade regjonâl 355 de Val dal Dean al stente a capî là che e finìs la Cjargne e al tache il Cjadovri: monts, boscs e prâts a imbastissin il paisaç cence interuzion. Se po o zontìn che la scuadre di balon dal lûc e zuie tal Campionât cjargnel e lis scuadris di schi a difindin i colôrs dal Friûl… nol fâs maravee che cualchidun al vedi tal cjâf di tornâ a puartâ Sapade dentri i confins de nestre Regjon. Cemût che al sucêt spes lant indaûr tal timp, ancje su la nassite di Sapade storie e liende si ingredein. Si conte par esempli di un trop di fameis scjampadis vie de tristerie dai conts Heinfels e rivadis juste ta cheste valade sù par jù ator dal X secul; il fat che i conts di Gurize culì a vessin tieris e a pocassin il trasferiment di minadôrs e contadins al podarès dâi man fuarte a cheste tradizion orâl. Dut câs, i prins documents su Plodn - cussì si clame Sapade tal lengaç di lidrîs gjermaniche fevelât a chenti - a rimontin al secul XIII e a testemonein la apartignince dal lûc al Patriarcjât di Aquilee. Sdrumât il Patriarcjât, dal 1420 il paîs al passe sot de Serenissime Republiche di Vignesie; dal 1797 al cognòs la ocupazion napoleoniche e, dal 1798 fint al 1866, la paronance dai Asburcs. Cu la vignude de Italie, al somee che a Sapade al rivi un moment di progrès magari cussì no fermât a sec de Grande vuere cun par conseguence l'oblic par dute la int di disvuedâ il paîs: dal 1917 al 1919 i sapadins a son sfolâts in Toscane e, tornâts tes lôr cjasis, tancj di lôr a scuegnaran cjapâsi sù e lâ vie pes Gjermaniis o ben viers la Svuizare: destin che inmò une volte ju lee ai fradis furlans. Planc a planc e nas intant la vocazion turistiche di Sapade, ma une altre vuere e je daûr de puarte; cussì, dome dai agns Cincuante la industrie turistiche e cjape pît pardabon, trasformant i cuindis borcs che a formin il Comun intun puest un grum preseât dai visitadôrs sei di unvier - in chei agns lis neveadis a jerin alc e ce - sei di istât: i trois e lis stradis di mont di ogni sorte che si cjatin ca sù a fasin la felicitât dai cjaminadôrs. Vierzi il paîs al turisim al à puartât cetancj contats e moments di confront cence par altri straviâ i sapadins de cussience de lôr specialitât culturâl e linguistiche, de braure di doprâ un lengaç particolâr - il plodarisch rivât culì insieme cui prins abitants e classificât dai studiôs tant che une sorevivence dal todesc medi alt - dal amôr pes lôr tradizions. Tantis a son lis usancis peadis aes scjadencis des stagjons e ae religjositât popolâr; i mistîrs di une volte vuê a tornin a vivi tai bai dal Grup folcloristic Holzhockar, ven a stâi il grup dai Sclapeçocs. Ma tra dutis lis tradizions chê plui sintude e je di sigûr la celebrazion dal Carnevâl. Protagonistis a son lis mascaris, massime il Rollat, intaiadis tal len, spes e vulintîr tramandadis di pari in fi: oparis une vore bielis, copie des musis duris e fuartis dal om di mont, che a disvelin l'estri e la maestrie dai artesans dal puest. La fieste dal Carnevâl si davuelç par trê domeniis, propit come une volte: la domenie dai puars, dai contadins e dai siôrs, cun vistîts e situazions diferentis daûr dal câs. Nol è dificil vualmâ lis someancis jenfri il Carnevâl di Sapade e chel di Sauris. Ve che a tornin leams e analogjis. E propit une relazion su Contatti e affinità storico-linguistiche tra Sappada, Sauris e Timau, par cure di Gianna Marcato de Universitât di Padue, e sarà il moment di fonde dai lavôrs de Fraie. ©RIPRODUZIONE RISERVATA