Ca di un pâr di agns mi soi interessât a un zuc su le rêt Internet, un manageriâl di balon la che si cjol su une scuadre cun tant di alenadôr e di zuiadôrs e, fasintju alenâ e impuestant tatichis di zuc esatementri come che al fasarès un alenadôr vêr, menà la scuadre simpri plui in su tes seriis fin in serie A. Il non di chest zuc al è Hattrick (triplete, par furlan), che al fo inventât 10 agns fa da un svedês, e cumò al conte cuasi 1 milion di utents dulintor dal mont. Vie vie che o zuiavi, o notavi che a jere un grum di int furlane che, esatementri come me, a si ere apassionade a chest zuc e leint des discussions su la Conference, un puest la che si scrivisi tra utents dal plui e dal mancul, o ai viodût che cualchidun si ere impegnât par realizâ le stesse idee che mi ere vignude su a mi: Hattrick al contave za 44 lenghis diferentis, tra cui il Frison e il Neerlandês, parcè mai nol varès vût di sedi voltât ancje par Furlan? O ai contatât imediadementri l’utent che al veve vude cheste maraveose idee, ElPiase, e lavorant insieme a lui e ad altris utents, intun an e mieç plui o mancul o sin rivâts a puartâ fûr la vore: a partî dal 21 di setembar il Furlan al è la 45esime lenghe uficiâl di Hattrick, che al po vantâsi di sedi il prin zuc online voltât par Furlan. Secont me, chest event al è une vore impuartant,parcè che o soi convint che nol restarà nome un esercizi di stîl, ma al podarà sedi un mût cun cui un grum di zovins furlans e an un contat diret cun le marilenghe scrite e chei che son residents tal forest, par lavôr o parcè fîs o nevôts di furlans lâts vie timp fa, e varan un mieç in plui cun cui mantignî un contat diret cun le nestre piçule Patrie. Cun chest contat diret e, par chei che zuin tant, zornalîr, o sperin verementri di dâ un grant contribût par mantignî vive e ative le nestre cjare lenghe furlane. Stefano Passantino